Sadıqov Rəsul Həşim

Vətən müharibəsi şəhidi Rəsul Həşim oğlu Sadıqov 2001-ci ildə 3 martda Bakıda dünyaya gəlib. 9 yaşından güləşlə məşğul olub, yarışlarda birincilik qazanıb. İmkansızlıqdan ali təhsil ala bilməyib.
Rəsul Sadıqov 2019-cu ildə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidməti tərəfindən Azərbaycan Silahlı Qüvvələrinə həqiqi hərbi xidmətə çağırılır və əsgər kimi Vətənə xidmət borcunu yerinə yetirir. Minamyot tuşlayıcısı olub.

Tovuz hadisələrində könüllü olaraq döyüşlərə qatılır. İkinci Qarabağ müharibəsində də könüllü kimi iştirak edir. Ağdərə, Suqovuşan, Murov yüksəkliyi, Kəlbəcər, Cəbrayıl uğrunda gedən döyüşlərdə şücaət göstərir. 2020-ci il 10 oktyabrda Ağdərə, Suqovuşan, Murov yüksəkliyi uğrunda gedən döyüşlərdə qəhrəmancasına şəhid olur. Mehdiabadda Şuşa Şəhidlər Xiyabanında dəfn olunub.
Ölümündən sonra döyüşlərdə fəal iştrakına görə "Vətən uğrunda" medalı, "Cəsur döyüşçü" medalı, “Suqovuşanın azad olunmasına görə” medalları ilə təltif olunub.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş hərbi qulluqçu, Rəsul Həşim oğlu Sadıqov Azərbaycan Respublikasının Prezidenti İlham Əliyevin Sərəncamına əsasən 3–cü dərəcəli “Vətənə xidmətə görə”  ordeni ilə təltif edilib.