Birinci ziyarətnamə

Şeyx Səduq “Mən la yəhzuruhul fəqih” adlı kitabında nəql edir ki, həzrət imam Rzadan (ə), imam Kazimin (ə) ziyarəti vaxtı yerinə yetirilən əməllər barəsində soruşdular və o həzrət buyurdu: “O həzrətin məzarı kənarında olan məsciddə namaz qılın və bu ziyarətnaməni oxuyun. Bu ziyarətnaməni bütün imamları ziyarət etdiyin vaxt, ümumiyyətlə bütün müqəddəs məzarları, o cümlədən peyğəmbərlərin məzarlarını ziyarət etdikdə də oxuya bilərsən:
Salam olsun Allahın yaxın bəndələri və seçdiyi şəxslərə! Salam olsun Allahın əmanətdarı və dostlarına! Salam olsun Allahın dostları və canişinlərinə! Salam olsun Allah mərifətinin qəlblərinə! Salam olsun Allah zikrinin məkanlarına! Salam olsun Allahın əmr və qadağasının aşkar olunduğu yerlərə! Salam olsun Allaha dəvət edənlərə! Salam olsun Allahın razılığı yolunda möhkəm dayananlara! Salam olsun Allaha itaətdə ixlaslı olanlara! Salam olsun Allaha doğru bələdçilərə! Salam olsun o şəxslərə ki, onları sevənlər Allahı da sevir, onları düşmən bilən Allahı da düşmən bilir, onları tanıyan Allahı da tanıyır, onları tanımayan Allahı da tanımır, onlara sarılan Allaha da sarılır və onları tərk edən Allahı da tərk edir! Allahı şahid tuturam ki, mən sizinlə sülh edənlə sülhdə və döyüşənlə döyüşdəyəm. Sizin gizli və aşkar işlərinizə imanım var və bütün işlərimi hər zaman sizə həvalə edirəm. Allah Məhəmmədin Əhli-beytini düşmən bilən cinlər və insanlara lənət etsin! Mən Allahın dərgahında onlara öz nifrətimi bildirirəm. Allahın salamı olsun Məhəmməd və onun Əhli-beytinə!
Bu ziyarətnamə, “Üsuli-kafi”, “Təhzib” və “Kamilüz-ziyarət” adlı kitablarda da nəql olunmuş və sonunda da qeyd edilmişdir ki, bu ziyarətnaməni hər bir müqəddəs məzarı ziyarət etdikdə oxumaq olar. Həmçinin orada qeyd edilmişdir ki, bu ziyarətnaməni oxuduqdan sonra Məhəmməd və ali Məhəmmədin(s.ə.s) bir-bir adlarını çəkərək, onlara çoxlu salavat göndərin və onların düşmənlərinə nifrin və lənət yağdırın. Sonra da özünə və mömin-möminələr üçün ürəyindən keçən duaları et.
Müəllif deyir: “ Belə güman olunur ki, yuxarıdakı bu bəyan, müəyyən bir hədisdən əxz olunubdur və bəzi hədis raviləri də bunu nəql ediblər. Belə ki, bütün məşhur hədis alimləri eyni əqidədədirlər ki, bu ziyarətnaməni hər bir müqəddəs məzarı ziyarət etdikdə oxumaq olar, necə ki, hədisin ilk cümlələri də bunu bildirir. Onlar, təlif etdikləri kitablarda bu ziyarətnaməni, “Camiə ziyarətnamələri” başlığı altında olan bölümlərdə nəql etmişdirlər. Həmçinin bu ziyarətnamənin sözlərindən də aydın olur ki, müəyyən bir məsuma məxsus deyildir və bütün məsumlar üçün oxuna bilər. Odur ki, bu ziyarətnaməni bütün imamların, hətta peyğəmbərlərin məzarını da ziyarət etdikdə oxuya bilərsiniz. Belə ki, bəzi alimlər, həzrət Yunisin (ə) ziyarətgahında bu ziyarətnaməni oxumağı tövsiyə etmişdirlər.
Həmçinin yuxarıda qeyd olunmuşdur ki, bu ziyarətnaməni oxuyub qurtardıqdan sonra imamların hər birinə xüsusi olaraq salam göndərilsin. Daha yaxşı olar ki, burada, “Cümə gününün əməlləri”nin sonunda Əbulhəsən Zərrab İsfahanidən nəql etdiyimiz salamları oxuyasınız.”