Həzrət Fatimə Zəhraya (s) istiğasə namazı

Rəvayət olunur ki, Allahdan bir hacətin olsa və bu hacət, səni sıxıntıya salsa, iki rükət namaz qıl. Namazın salamlarını dedikdən sonra üç təkbir de və həzrət Zəhranın (s) zikrini de. Daha sonra səcdəyə get və yüz dəfə “Ya məvlati, ya Fatimətu, əğisini” sözlərini de. Əvvəlcə üzünün sağ tərəfini, sonra isə sol tərəfini yerə qoy və yenə də yüz dəfə bu sözləri de. Sonra bir daha səcdəyə get və yüz on dəfə bu sözləri dedikdən sonra öz hacətini istə. Şübhəsiz ki, Allah taala sənin bu hacətini rəva edəcəkdir.
Müəllif deyir: Şeyx Həsən ibni Fəzl Təbərsi “Məkarimul-əxlaq” adlı kitabında buyurubdur: “Həzrət Fatimə Zəhranın (s.ə.) istiğasə namazı bu qaydadadır: İki rükət namaz qılırsan və namazdan sonra səcdəyə gedib, yüz dəfə “Ya Fatimətu” sözünü deyirsən. Əvvəlcə üzünün sağ tərəfini və sonra üzünün sol tərəfini yerə qoyub, yenə də yüz dəfə “Ya Fatimətu” sözünü deyirsən. Daha sonra bir daha səcdəyə gedib, yüz on dəfə bu sözü deyirsən. Sonunda bu duanı oxuyursan:
Ey hər bir şeyə əmin-amanlıq verən və hər bir şeyin Səndən qorxub çəkindiyi! Səndən hər bir şeyə verdiyin əmin-amanlıq və hər bir şeyin Səndən qorxusu ilə istəyirəm ki, Məhəmmədə salam yetirəsən, heç kimdən və heç bir şeydən qorxmamaq üçün özümə, əhli-əyalıma, malıma və övladlarıma əmin-amanlıq əta edəsən. Doğrudan da, Sən hər bir şeyə qadirsən.
Yenə də bu kitabda İmam Sadiqdən (ə) belə buyurduğu rəvayət olunur: “Sizlərdən hər biriniz Allah taalaya istiğasə eləmək istəsəniz, iki rükət namaz qılaraq səcdəyə gedib belə desin:
Ey Məhəmməd, ey Allahın Rəsulu! Ey Əli, ey mömin kişilər və qadınların sərvəri! Sizin vasitənizlə uca Allaha yalvarıb-yaxarıram. Ey Məhəmməd, ey Əli! Sizin vasitənizlə yardım diləyirəm. Ey Allah, ey Məhəmməd, ey Əli və ey Fatimə, fəryada yet!
Axıra qədər bütün imamların adlarını sayırsan və sonra deyirsən:
Mən sizin vasitənizlə uca Allaha təvəssül edirəm!