Qədr gecəsi barədə Quran nə deyir?

Qədr gecəsi barədə Quran nə deyir?
1). Qurani-Kərim mübarək Ramazan ayında nazil olub (Bəqərə surəsi, ayə: 185).
2). Qurani-Kərim mübarək gecədə nazil olub. Hansı ki, o gecədə hər bir iş İlahi dərgahdan gələn əmr ilə ayrıd ediləcək. Və bu Allahın insanlara göstərdiyi rəhmət və mehribanlığa görədir. (Duxan surəsi, 1, 2, 3, 4, 5 və 6-cı ayələr).
3). Biz Quranı Qədr gecəsi nazil etdik. Elə bir gecə ki, dəyəri sizin dərkinizin fövqündədir. O gecə 1000 aydan daha xeyirlidir! O gecə mələklər və Ruh xüsusi əmrlə yer üzünə enirlər. O gecə salamatçılıq gecəsidir.
P.S: Bu üç ayədən çox asanlıqla başa düşülür ki, Qədr gecəsi Quranın nazil olduğu gecədir və həmin gecə Ramazan ayında yerləşir. Bütün müsəlmanların etiqadına əsasən isə həmin gecə Ramazan ayının 17, 19, 21, 23, 25, 27 və 29-cu gecələrindən birinə təsadüf edir. Peyğəmbər də mübarək Ramazan ayının son 10 gecəsini ibadətlə məşğul olardı.
Şiə və Əhli-Sünnə hədislərində 23-cü gecənin Qədr gecəsi olmasına dair ehtimalı gücləndirən səhih hədislər olsa da, əhli-sünnə Übəyy ibn Kəbin Qədr gecəsinin 27-ci gecədə olmasına dair and içməsi səbəbi ilə 27-ci gecəni daha çox önəmsiyirlər. Halbuki Übəyyin andına söykənmək üçün heç bir məntiqi dəlil yoxdur, madam ki, Allah-Taala bu gecənin qeyb pərdəsində qalmasını iradə etmişdir.
Hər halda hədislərimizdə həm Qədr gecəsi ilə bağlı ehtimallar var, həm də bu gecə ilə bağlı əməllər və ayinlər ki, ən ümdəsi bu gecəni oyaq qalıb ibadət etməkdir.
Axı niyə də oyaq qalmayaq? Məgər Allahın mübarək elan etdiyi bir gecədə insan yatarmı? Mələklərin və Ruhun nazil olduğu bir gecədə necə yatıb İlahi nəsimdən binəsib olasan axı?! Bir gecəni ki, hər şey həmin gecədə baş verir, necə yatmaq olar və necə qəflətdə keçirmək olar, axı?