Bağırov Ramiz Yusif

Bağırov Ramiz Yusif oğlu 1958-ci ildə Gəncə şəhərində doğulmuşdur. 1965-ci ildə Gəncə şəhər M.Ə.Sabir adına 5 nömrəli tam orta məktəbin birinci sinfinə daxil olmuş, 1975-ci ildə həmin məktəbi bitirmişdir. 1976-cı ildə  Gəncə şəhər   89 nömrəli texniki peşə məktəbinə daxil olmuş, “Kino-mexanik” peşəsi üzrə təhsil almışdır. 1977-1979-cu illərdə həqiqi hərbi xidmətdə olmuş, xidməti borcunu Rusiya Federasiyası (o vaxtkı SSRİ), Primorsk Vilayətinin Vladivostok şəhərində yerinə yetirmişdir. Hərbi xidmətdən qayıtdıqdan sonra Gəncə şəhərindəki “Billur” zavodunda çilingər-mexanik işləmiş, eyni zamanda Azərbaycan Texnologiya İnstitutunun (indiki UTECA) axşam şöbəsində təhsil almışdır. O, 2006-ci ilə qədər “Billur” zavodunda işləmişdir. Ailəli, Iki övlad atası idi. 

Ramiz Bağırov 2020-ci il 11 oktyabr tarixində Ermənistan silahlı qüvvələri tərəfindən Gəncənin raket atəşinə tutulması nəticəsində həlak olmuşdur.
Azərbaycan Respublikası Nazirlər Kabinetinin 1994-cü il 15 yanvar tarixli 10 nömrəli Qərarı ilə təsdiq edilmiş “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları”nda dəyişiklik edilməsi barədə Azərbaycan Respublikasının Nazirlər Kabinetinin 20 noyabr 2020-ci il tarixli Qərarına əsasən Bağırov Ramiz Yusif oğluna şəhid statusu verilmişdir.