Baxışlı Baxış Eldar

Baxışlı Baxış Elşən oğlu 1994-cü il noyabrın 7-də Tərtər rayonunun İsmayılbəyli kəndində anadan olub. O,  İsmayılbəyli kənd tam orta məktəbini qurtardıqdan sonra yüksək balla Dövlət Sərhəd Xidməti Akademiyasına qəbul olub və akademiyanı fərqlənmə diplomu ilə bitirib.

Mayor Baxışlı Baxış 2024-cü il iyun ayının 9-da xidməti vəzifəsini yerinə yetirərkən Dövlət Sərhəd Xidmətinin  Sərhəd Qoşunlarının “Lənkəran” sərhəd dəstəsinin xidməti ərazisində, Astara rayonunda ildırım vurması nəticəsində həlak olub. Dövlət Sərhəd Xidmətinin  hərbi qulluqçusu,  şəhid mayor Baxışlı Baxış doğulduğu Tərtər rayonunun İsmayılbəyli kəndində torpağa tapşırılıb.

44 günlük Vətən müharibəsində döyüşlərdə iştirak edib. Xidmətdə fərqləndiyinə görə sağlığında “Hərbi xidmətdə fərqlənməyə görə” 2-ci və 3-cü dərəcəli, “Silahlı qüvvələrin 95 illiyi”, “Azərbaycan Sərhəd mühafizəsi”, “Sərhəddə fərqlənməyə görə”, “Qüsursuz xidmətə görə” 3-cü dərəcəli medalları ilə təltif edilib.

Azərbaycan Respublikası dövlət sərhədinin mühafizəsinin təmin edilməsində, ərazi bütövlüyünün qorunub saxlanılmasında və sərhəd mühafizə orqanları qarşısında qoyulmuş tapşırıqların yerinə yetirilməsində fərqləndiklərinə görə Azərbaycan Respublikası Dövlət Sərhəd Xidmətinin hərbi qulluqçusu Baxışlı Baxış Eldar oğlu “Vətən uğrunda” medalı ilə təltif edilib. 

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında və dövlət sərhədinin mühafizəsi üzrə xidməti vəzifələrinin icrası zamanı igidlik və mərdlik göstərmiş, hərbi hissə qarşısında qoyulmuş tapşırıqları icra edərkən vəzifə borcunu şərəflə yerinə yetirərək şəhid olmuş Azərbaycan Respublikası Dövlət Sərhəd Xidmətinin  hərbi qulluqçusu Baxışlı Baxış Elşən oğlu  ölümündən sonra 3-cü dərəcəli “Vətənə xidmətə görə” ordeni ilə təltif edilib.