Əhmədov Vüsal İlqar

Həyat yoldaşı Əhmədova Yeganə – Vüsalın hərbi sahəyə olan marağı gec də olsa onu hərbidə işə başlamağı ilə nəticələndi. Vətən müharibəsində gedib könüllü yazılsa da onu müharibəyə aparmadılar. Çox məyus olmuşdu. Müharibə bitdikdən sonra bir neçə dəfə gedib gəldi hərbiyə düzəlmək üçün nəhayət düzəldi də. Antiterror əməliyyatı zamanı da ən fəal iştirak edənlərdən olmuşdu. Sonuncu dəfə evdə olanda və gedəndə övladımız Eşqin onu buraxmırdı getməyə, elə bil uşağın da ürəyinə dammışdı ki, bu atasıyla sonuncu görüşdür. Buna hamımız məəttəl qalmışdıq və telefona da çəkdik həmin kadrları. Bizə ciddi gəlməyən bu hərəkət sən demə uşağın bizə demək istədiyi idi ki, siz də atamla sonuncu dəfə görüşürsüz...Bu həqiqətən son görüş oldu. O bizim və hamının qəhrəmanı oldu. Övladını da çalışıb onun kimi qəhrəman böyüdəcəyəm...