Ələsgərov Ceyhun Camal

Ələsgərov Ceyhun Camal oğlu 1 dekabr 1958-ci ildə Ağdam rayonunda doğulmuşdur. 1965-ci ildə Ağdam rayon 1 nömrəli tam orta məktəbin birinci sinfinə daxil olmuş, 1975-ci ildə həmin məktəbi bitirmişdir.  1976-cı ildə Bakı Politexnik İnstitutuna (indiki Azərbaycan Texniki Universiteti) daxil olmuşdur.  1981-ci ildə ali təhsilini başa vurduqdan sonra təyinatı üzrə Gəncə Yağ-Piy Kombinatının Yağ zavoduna sex rəisi təyin olunmuşdur. 1996-cı ildən Gəncə Qənnadı fabrikində baş mühəndis vəzifəsində çalışmışdır. 2016-cı ildən “AzərAlüminium” MMC-də növbə rəisi kimi fəaliyyət göstərmişdir. Ailəli, 2 övlad atası idi.

Gəncə sakini Ceyhun Ələsgərov 2020-ci il 11 oktyabr tarixində Ermənistan silahlı qüvvəlləri tərəfindən Gəncənin raket atəşinə tutulması nəticəsində həlak olmuşdur.

Azərbaycan Respublikası Nazirlər Kabinetinin 1994-cü il 15 yanvar tarixli 10 nömrəli Qərarı ilə təsdiq edilmiş “Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları”nda dəyişiklik edilməsi barədə Azərbaycan Respublikasının Nazirlər Kabinetinin 20 noyabr 2020-ci il tarixli Qərarına əsasən Ələsgərov Ceyhun Camal oğluna şəhid statusu verilmişdir.