Əliyev Asif Adil

Asif Adil oğlu Əliyev 2002-ci ildə Siyəzən rayonunda anadan olub. Asif Əliyev 2020-ci ilin iyulundan Azərbaycan Silahlı Qüvvələrində həqiqi hərbi xidmət edirdi.

Azərbaycan Ordusunun əsgəri olan Asif Əliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak etmişdir. Murovdağın azad olunması uğrunda gedən döyüşlərdə vuruşmuşdur. O, müharibədə iştirak edən ən gənc əsgərlərdən biri idi.

Azərbaycanın Kəlbəcər rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 29.12.2020-ci il tarixli Sərəncamına əsasən Asif Əliyev "Kəlbəcərin azad olunmasına görə" medalı ilə təltif edildi.

Müharibə bitdikdən sonra Kəlbəcər rayonunda yerləşən "N" saylı hərbi hissədə xidmətini davam etdirən Asif Əliyev 2022-ci ilin yanvarında xidmətdən tərxis olunacaqdı.

2021-ci il dekabrın 8-i saat 14:35-dən 15:30-dək Ermənistan Silahlı Qüvvələrinin bölmələri Basarkeçər rayonunun Yuxarı Şorca yaşayış məntəqəsində yerləşən mövqelərindən Kəlbəcər rayonunun Zəylik yaşayış məntəqəsində yerləşən Azərbaycan Ordusunun mövqelərini atıcı silahlardan istifadə etməklə intensiv atəşə tutmuşdur.Növbəti təxribat nəticəsində Asif Əliyev şəhid olmuşdur. Asif Əliyevin nəşi 8 dekabr 2021-ci ildə doğulduğu Siyəzən rayonunun Zarat kəndinə gətirilmiş və burada dəfn edilmişdir.