Əlizadə Nofəl Qənbər

Nofəl Qənbər oğlu Əlizadə Bərdə rayonu Saatlı kəndində anadan olub. Ailədə cəmi iki övlad olan Nofəlin özündən başqa bir bacısı var. Nofəl həqiqi hərbi xidmətini başa vurduqdan sonra 2013-2019-cu illərdə Daxili Qoşunların sıralarında müddətdən artıq hərbi xidmət keçib. Müqaviləsi başa çatandan sonra evə gələrək sahibkarlıq fəaliyyətilə məşğul olacağını qarşısına məqsəd qoyub. Valideynlərinin bildirdiyinə görə, o planlaşdırdığı işini başa çatdıra bilməyib...
Nofəl Tovuz hadisələrindən sonra yenidən hərbi xidmətdə qayıtmaq istəyini bildirib. Onu bu fikirdən daşındırmaq istəyən atası tək oğul övladı olduğu üçün öz işini davam etdirməyini və atasına müəyyən işlərdə yardımçı olmasını deyib. Atanın bu sözünə “Ata, o şərəfsizlər generalımızı şəhid edib. Haqqını halal elə, amma mən xidmətə qayıdacağam” deyib. Bu söhbətdən sonra o, yenidən ordu sıralarına qayıtmaq üçün könüllü müraciət edib.

Nofəl II Qarabağ müharibəsi dövrünə Tərtər-Ağdərə istiqamətində döyüşüb. Ayın 28-i düşmən tərəfindən atılan artilleriya mərmisinin partlaması nəticəsində aldığı qəlpə yarasından şəhid olub.

Ölümündən sonra şəhidimiz Prezidentin Sərəncamlarına əsasən, "Suqovuşanın azad olunmasına görə" , "İgidliyə görə" və "Vətən uğrunda" medallarıyla təltif edilib.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş hərbi qulluqçu, Nofəl Qənbər oğlu Əlizadə Azərbaycan Respublikasının Prezidenti İlham Əliyevin Sərəncamına əsasən 3–cü dərəcəli “Vətənə xidmətə görə”  ordeni ilə təltif edilib.