Əzizov Nəzər Ağacəlil

Anası Əzizova Cəmafət: Nəzər körpəlikdən sarışın, gözəl uşaq olub. Qohum-qonşunun, tanış-bilişin sevimlisi idi. Nəzər uşaq vaxtı dava-dava oyununu çox sevirdi. Uşaq vaxtı da oyuncaq avtomat, tapança ilə oynayardı. Böyüdü hərbi xidmətə getdi, gəldi. Sonra hərbidə işə düzəldi, - Xüsusi Təyinatlı Qüvvələrdə. Elə sevinirdi ki... O tək oğlum olsa da, artıq mənim yox, Vətənin oğlu, əsgəri idi. Aprel döyüşlərində iştirak etməsindən, Lələtəpə uğrunda döyüşməsindən çox-çox sonralar bilmişik biz. Vətən Müharibəsində də xüsusi şücaətlər göstərib, düşmənə qan uddurmuşdu. Buna görə də çoxlu medalla təltif olunmuşdu balam. Bu müharibədən çıxandan sonra artıq onun ölümsüz olduğunu düşünürdük. Lakin sentyabrın 12-13-də ermənilər təxribat törədib, Nəzər də təxribatın qarşısını alarkən xüsusi qəhrəmanlıq göstərib şəhid oldu. Şəhid olmamışdan bir-neçə gün əvvəl zəng etmişdi. Oğlu birinci sinfə gedəcəkdi, dedi ki, ana mən gələ bilməyəcəm, yaxşı süfrə aç uşağın məktəbə getməsinə görə, mən sonra gələcəm qeyd edərik. Gəlişi də “şəhid” gəlişi oldu, bütün şəhərin çiynində gəldi, hamının fəxri oldu...