Hacıyusifov Əhməd Teymur

Əhməd Teymur oğlu Hacıyusifov 2001-ci ildə Şəki rayonunun Baş Göynük kəndində anadan olub. 2007-2018 ci illərdə Şəki rayon Baş Göynük kənd 2 saylı tam orta məktəbdə təhsil alıb. 2019-cu ildən Ağcabədi rayonu ərazisində N saylı hərbi hissədə əsgəri xidmətə başlayıb.

Azərbaycan Ordusunun əsgəri olan Əhməd Hacıyusifov 27 sentyabr 2020-ci il tarixdə Azərbaycan Silahlı Qüvvələri tərəfindən Ermənistanın işğalı altında olan əraziləri azad etmək və Azərbaycanın ərazi bötüvlüyünü bərpa etmək uğrunda başlanan Vətən müharibəsində iştirak edib. Cəbrayıl, Füzuli, Zəngilan, Qubadlı istiqamətində həyata keçirilən döyüşlərin iştirakçısı olub. Cəbrayıl, Füzuli istiqamətində döyüşlərdə qəhramanlıq göstərib. Bu igidliyinə görə Əhməd Hacıyusifova fərqlənmə sertifikatı verilib, hərbi hissə komandanlığı tərəfindən ailəsinə təşəkkür edilib. Əhməd Hacıyusifov Şuşa uğrunda gedən döyüşlərdə qəhramancasına şəhid olub. 6 noyabr 2020-ci il tarixdə doğulduğu Şəki rayonunun Baş Göynük kəndində canı qədər sevdiyi torpağa tapşırılıb.

Döyüşlərdə göstərdiyi qəhrəmanlıqlara görə, Azərbaycan Respublikasının Prezidenti İlham Əliyevin müvafiq sərəncamlarına əsasən Əhməd Teymur oğlu Hacıyusifov “Vətən uğrunda”, “Füzulinin azad olunmasına görə”, “Xocavəndin azad olunmasına görə”, “Cəbrayılın azad olunmasına görə” və “Cəsur döyüşçü” medalları ilə təltif edilib.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş hərbi qulluqçu, Əhməd Teymur oğlu Hacıyusifov Azərbaycan Respublikasının Prezidenti İlham Əliyevin Sərəncamına əsasən 3–cü dərəcəli “Vətənə xidmətə görə”  ordeni ilə təltif edilib.