İsmayılov Vüqar Məmmədqasım

İsmayılov Vüqar Məmmədqasım oğlu 17 oktyabr 1992- ci ildə Şabran rayonunda anadan olmuşdur. 1999- cu ildə Şabran rayonu Samir Zülfüqarov adına  3 saylı tam orta məktəbə qəbul olmuşdur. Həmin ildən sambo idman növü ilə məşğul olmağa başlamış, dəfələrlə Respublika üzrə yarışlarda 1- ci yerlə layiq görülmüşdür. Məktəbi bitirdikdən sonra 2010- cu ildə hərbi xidmətə yollanmışdır. 
2013- cü ildən Azərbaycan Respublikasının Daxili Qoşunlarında Xüsusi Təyinatlı Dəstədə xidmətə başlayır. Daxili İşlər Nazirliyində keçirilən sambo və cudo yarışları üzrə dəfələrlə birinciliyə layiq görülmüşdür. 
2019- cu ildən Müdafiə Nazirliyinin N saylı hərbi hissəsində kəşfiyyatçı kimi xidmətə başlayır. 
İkinci Qarabağ müharibəsində qəhrəmancasına iştirak etmiş, iki dəfə yaralanmış, buna baxmayaraq müharibənin son gününə qədər vuruşmuşdur. 
“Füzulinin azad olunmasına görə”, “Xocavəndin azad olunmasına görə”, “Şuşanın azad olunmasına görə” və “Cəsur döyüşçü” medalları ilə təltif edilmişdir.
Azərbaycan Silahlı Qüvvələrinin hərbi qulluqçusu olan İsmayılov Vüqar Məmmədqasım oğlu Azərbaycan Respublikasının Silahlı Qüvvələri tərəfindən 20 sentyabr 2023-cü il tarixində həyata keçirilmiş uğurlu lokal antiterror tədbirləri zamanı 23 sentyabr 2023- cü ildə Xocalı rayonu Dağyurd kəndi istiqamətində gedən döyüşlərdə şəhid olmuşdur. 
Azərbaycan Respublikasının ərazi bütövlüyünün təmin olunmasında yüksək peşəkarlıq, şücaət və mərdlik göstərmiş, öz xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqlənmiş Azərbaycan Respublikası Silahlı Qüvvələrinin hərbi qulluqçusu İsmayılov Vüqar Məmmədqasım oğlu Azərbaycan Respublikasının prezidenti İlham Əliyevin sərəncamına əsasən “Vətən uğrunda” medalı və   3-cü dərəcəli “Vətənə xidmətə görə” ordeni ilə təltif edilmişdir.  
Şəhid kiçik leytenant İsmayılov Vüqar Məmmədqasım oğlu Şabran rayonu Şəhidlər Xiyabanında dəfn edilmişdir.