Kərimli Teymur Musa

Şəhid Qasımov Eltunla bir yerdə yaralanıb. Ağır döyüşlərdən sonra Hadruta daxil olduq. Gecə yarısı olduğundan irəliləmək təhlükəliydi və bir qədər istirahət etmək qərarına gəlindi. 20 dəqiqəlik istirahət vaxtı qeyri-iradi yuxuya getmişdik. Qısa müddət sonra yenidən atışma başlandı. Bu zaman biz mövqeyimizi irəli çəkməyə başladıq. Artıq səhər açılırdı, düşmən mövqeylərini tərk edib getmişdi. Bu zaman Eltun mənə çox qəribə bir hadisənin baş verdiyini bildirdi. O yuxu gördüyünü, ancaq bunun yuxu olmadığını, ruhunun evlərinə getdiyini, oğlu ilə, ailəsi ilə görüşdüyünü, oğluna toxunduğunu bildirdi. Mən zarafatyana ona dedim ki, yorğunsan və ev üçün darıxmısan, oğlun üçün darıxmısan deyə elə görmüsən yuxunda. Lakin o təkidlə bunun yuxu olmadığını bildirdi. Bu hadisədən 3 gün sonra şəhadətə qovuşdu.