Məmmədov Xaqani Mürşüd

Anası Məmmədova Esmira: Xaqani dünyaya gələndə sevincimizin həddi-hüdudu yox idi. O, sakitliyi, məsumluğu ilə özünü hamıya sevdirə bilmişdi. Xaqani məktəbi "4", "5" qiymətlərlə bitirdikdən sonra sənədlərini öz istəyi ilə Şamaxı Regional Kollecinə verdi və qəbul oldu. 1 il orda oxudu, əla qiymətlər aldı, özünə hörmət qazandı. İndi orada onun adına guşə yaradıblar, tez-tez xatirəsini anırlar. Haqqında video sujet hazırlayıblar. 1-ci kursu bitirəndə hərbi xidmətə getdi, tələbəliyi yarımçıq qaldı balamın... 40 gündən çox döyüşdə olub, 5 gün də təlimdə. Həftədə bir, ya iki dəfə danışırdı cəbhədən. Eşitdiyimizə görə yanındakı döyüş yoldaşları da Şəhid olub. Oğlum müharibəyə gedəndə əli ilə əzizləyib əsgərlikdən qalan formasını divardan asdı, şəkillərini də yanına düzdü getdi. Şəhid olacağını bilirmiş kimi, özünə Şəhid guşəsi bəzədi getdi.

Müəllimi Binyət Abdullayeva: Özümü xoşbəxt müəllim hesab edirəm ki, bu günə qədər dərs dediyim hər bir şagirddə vətənpərvərlik duyğusu, Vətənə sevgi yüksək olub. Açığı bu sevgini aşılamağa ehtiyac da duymamışam. Çünki onlar doğulduqları gündən ürəklərində olan Vətən sevgisi də onlarla bir yerdə doğulub və böyüyüb. Həmin şagirdlərimdən biri də Şəhid Xaqani Məmmədovdur. Məktəbdə oxuduğu müddət ərzində o, intizamlı, çalışqan şagird olub, məktəbin ictimai işlərində fəal iştirak edib, şagird kollektivinin, müəllimlərinin sevimlisi olub. Xaqani çox mehriban və sakit uşaq olub. Hansı tapşırığı versəm canla-başla yerinə yetirərdi. Əsgərliyini də uğurla başa vurdu. Müharibə başlananda isə könüllü cəbhəyə getdi. Onun şəhid olması xəbəri bütün kəndi sarsıtdı.