Nəbiyev Elçin Fikrət

Elçin Nəbiyev 10 dekabr 1967-ci il tarixdə Balakən rayonunun Xalatala kəndində, ziyalı ailəsində anadan olub. 1986 – 1990-cı illərdə Aviasiya marşalı V.A.Sudsa adına Stavrapol Pilot və Şturman Ali Hərbi-Aviasiya Məktəbində(ru) (rus.: Ставропольское высшее военно-авиационное училище лётчиков и штурманов имени маршала авиации В. А. Судца) taktiki aviasiya sturmanı (rus.: штурманская тактическая авиации) ixtisası üzrə təhsil alıb.
Sovet vaxtı Rusiyanın MİQ-31 qırıcı təyyarəsində uçuşlar həyata keçirib. I Qarabağ müharibəsində ön cəbhədə düşmənin koordinatlarını, atəş nöqtələrini artilleriya və aviasiyaya ötürüb. Vətən Müharibəsində isə uğurlu əməliyyatların tərtibində müəlliflərdən biri, ön cəbhədə məxfi qərargahda birbaşa iştirakı olan şəxslərdən biri olub.
30 noyabr 2021-ci il tarixdə Xızı rayonundakı Qaraheybət Aviasiya Poliqonunda Azərbaycan Respublikası Dövlət Sərhəd Xidmətinin helikopteri ilə təlim uçuşlarında iştirak edərkən baş vermiş qəza nəticəsində 53 yaşında həlak olub.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında və dövlət sərhədinin mühafizəsi üzrə xidməti vəzifələrinin icrası zamanı igidlik və mərdlik göstərmiş, hərbi hissə qarşısında qoyulmuş tapşırıqları icra edərkən vəzifə borcunu şərəflə yerinə yetirərək şəhid olmuş Azərbaycan Respublikası Dövlət Sərhəd Xidmətinin  hərbi qulluqçusu Elçin Nəbiyev  ölümündən sonra 3-cü dərəcəli “Vətənə xidmətə görə” ordeni ilə təltif edilib.

1 dekabr 2021-ci il tarixdə Bakıda II Şəhidlər Xiyabanında dəfn edilib.