Nəsibov Kənan Cəbrayıl

Kənan Nəsibov 20 aprel 1999-cu ildə Tovuz rayonunun Əsrik Cırdaxan kəndində anadan olmuşdur. 2005-2016-cı illərdə orta təhsil almışdır. Subay idi.
Kənan Nəsibov Azərbaycan Silahlı Qüvvələrinin sıralarında xidmət edən müddətdən artıq həqiqi hərbi xidmət qulluqçusu idi. Öz istəyi ilə Tovuz rayonundakı xidmət yerini dəyişərək Kəlbəcər rayonunda yerləşən "N" saylı hərbi hissələrin birində xidmətini davam etdirirdi.

2022-ci il sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilmişdir. Təxribat nəticəsində Azərbaycan-Ermənistan sərhədində sərhəd toqquşması baş vermişdir. Döyüşlərdə müddətdən artıq həqiqi hərbi xidmət qulluqçusu və snayper olaraq iştirak edən Kənan Nəsibov 13 sentyabr 2022-ci ildə Kəlbəcər rayonu istiqamətində döyüş tapşırığını yerinə yetirərkən şəhid olmuşdur. Nəşi yaşadığı evə gətirilərək doğulduğu Tovuz rayonunun Əsrik Cırdaxan kəndində dəfn edilmişdir. Dəfn mərasimində Tovuz rayon İcra Hakimiyyətinin başçısı Məmməd Məmmədov, Milli Məclisin deputatı Ülviyyə Ağayeva, hüquq-mühafizə orqanlarının rəhbərləri, hərbçilər, rayon ictimaiyyətinin nümayəndələri iştirak etmişlər.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Kənan Nəsibov Azərbaycan Prezidenti İlham Əliyevin 05.11.2022-ci il tarixli Sərəncamına əsasən ölümündən sonra 3-cü dərəcəli "Rəşadət" ordeni və "Vətən uğrunda" medalı ilə təltif edilmişdir.