Qurbanov Şirin Tacəddin

Qazimiz müharibənin başladığını eşitdikdən sonra dərhal könüllü kimi qeydiyyata düşmək üçün müvafiq dövlət orqanına müraciət etmişdir və qeydiyyata düşmüşdür. Qısa zaman içində isə cəbhəyə yollanmışdır. Onun sözlərinə əsasən, həmişə düşmənlərlə hesablaşma gününün gəlməsini gözləmişdir, onlardan intiqam almağı arzu etmişdir. Bu məsələdə bir döyüşçü kimi, bir vətəndaş kimi qatqısı olduğu üçün özünü xoşbəxt hiss edir. Şirin deyir ki, “cəbhəyə yollanmazdan əvvəl yaralanacağımı bilirdim, hətta bu barədə dostlarıma və tanışlarıma da bildirmişdim. Lakin buna baxmayaraq istəyirdim ki, bu problem, bu bəla xalqımızın, millətimizin taleyindən birdəfəlik silinsin, biz uşaqlarımıza bütöv torpaq, güclü dövlət əmanət edək. Şükürlər olsun ki, biz torpaqlarımızı geri qaytardıq, düşməni elədiyi əməllərə görə cavab verməyə məcbur etdik. Dövlətimiz də günü gündən güclənir, bu qələbə bizim millətimiz və dövlətimiz üçün tarixi bir əhəmiyyət kəsb edir”.