Rəsulov Murad İlqar

Rəsulov Murad İlqar oğlu 5 avqust 2000 il Şabran şəhəri anadan olmuşdur.  2006-2013-cü illərdə Şabran şəhər 3 saylı orta məktəbdə təhsil almışdır. 2013-2017-ci illərdə Şabran şəhər 2 saylı məktəb-liseydə təhsilini davam etdirmişdir. 2017-ci ildə yüksək balla Heydər Əliyev adına Azərbaycan Ali Hərbi Məktəbinə qəbul olunur.

Vətən Müharibəsi zamanı AAHM-in 4 kurs tələbəsi olan Murad Rəsulov kursant kimi döyüşlərə qatılır. Döyüşlərin gedişatında ona “kiçik leytenant” hərbi rütbəsi verilir və “N” saylı hərbi hissəyə tağım komandiri təyin edilir.

Azərbaycan Ordusunun kiçik leytenantı olan Murad Rəsulov, Füzuli, Cəbrayıl, Zəngilan və Qubadlı rayonlarının azadlığı uğrunda gedən döyüşlərdə savaşıb.

Vətən Müharibəsi bitdikdən sonra Murad Rəsulov AAHM-də təhsili davam etdirmiş və uğurlu nəticələrlə məzun olmuşdur.

2021-ci il oktyabrın 1-də “leytenant” hərbi rütbəsi ilə “N” saylı hərbi hissəyə tağım komandiri təyin edilmişdir.

Azərbaycan Ordusunun leytenantı Murad Rəsulov 2022-ci il sentyabrın 12-də Ermənistan Silahlı Qüvvələri tərəfindən törədilən genişmiqyaslı təxribatın qarşısının alınması zamanı şəhid olub. Şabran Şəhidlər Xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin  Sərəncamına əsasən Murad Rəsulov  "İgidliyə görə" medalı ilə təltif edilib.

Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin Sərəncamına əsasən Murad Rəsulov "Qubadlının azad olunmasına görə" medalı ilə təltif edilib.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş Murad Rəsulov Azərbaycan Prezidenti İlham Əliyevin 05.11.2022-ci il tarixli Sərəncamına əsasən ölümündən sonra 3-cü dərəcəli "Rəşadət" ordeni və "Vətən uğrunda" medalı ilə təltif edilmişdir.