Rustamov Ruslan Nüsrət

Rustamov Ruslan Nüsrət oğlu 1981-ci il oktyabrın 23-də Hacıqabul rayonunun Udulu kəndində dünyaya göz açıb. Ayaz Baxşəliyev adına Şorbaçı kənd tam orta məktəbində təhsil alıb. Atası həmin məktəbdə hərbi rəhbər işlədiyi üçün Ruslan uşaq vaxtlarından hərbçi peşəsinə maraq göstərib. Ruslan 2000-ci ildə həqiqi hərbi xidmətə çağırılanda Vətənin keşiyini çəkməyə ruh yüksəkliyi ilə yollanıb. Xidmətini bitirdikdən sonra 2004-2009-cu illərdə Azərbaycan Dövlət Bədən Tərbiyəsi və İdman Akademiyasında təhsil alıb. Ali təhsilini bitirsə də, hərbçi olmaq arzusundan əl çəkməyib. 2014-cü ildə N saylı hərbi hissədə xidmətə başlayıb. 2016-cı ildə Silahlı Qüvvələrin Təlim və Tədris Mərkəzinin ehtiyat zabit hazırlığı kursunu bitirib. Əvvəlcə leytenant, sonra isə baş leytenant hərbi rütbəsi alıb. 2016-cı ildən ön cəbhədə yerləşən N saylı hərbi hissələrdə motoatıcı taqım komandiri, motoatıcı bölük komandiri vəzifələrində xidmət edib.

Baş leytenant Ruslan Rüstəmov sentyabrın 27-də başlanan İkinci Qarabağ müharibəsinin ilk günlərindən düşmənlə üz-üzə Vətənin müdafiəsində və torpaqlarımızın işğaldan azad olunmasında fəal iştirak edib. Murovdağ yüksəkliyi, Suqovuşan, Talış kəndi istiqamətlərində gedən döyüşlərdə iştirak edən Ruslan 2020-ci il oktyabrın 2-də Ağ uçuq deyilən ərazidə qəhrəmancasına şəhid olub.

Rüstəmov Ruslan Nüsrət oğlu döyüşlərdə göstərdiyi şücaətə görə ölümündən sonra “Vətən uğrunda”, “Suqovuşanın azad olunmasına görə” “III dərəcəli Vətənə xidmət” və “İgidliyə görə” medalları ilə təltif olunub.