Zeynalov Ramin Yasən

Zeynalov Ramin Yasən oğlu 2000-ci ilin martın 1-də Ağdam rayonu, Qiyaslı kəndində məcburi köçkün ailəsində anadan olub. Ailə Ağdam rayonunun Baharlı qəsəbəsində məcburi köçkün ailələri üçün tikilən 2 otaqlı evlə təmin olunub. Orta məktəbi bitirdikdən sonra, Ağdam Dövlət Sosial İqtisad kollecinə daxil olub. Kolleci bitirən Ramin 2020- ci ilin iyul ayında həqiqi hərbi xidmətə gedib. Vətən müharibəsi başlayanda bütün vətənpərvər oğullar kimi 3 ayın əsgəri olan Ramin də döyüşlərə qatılıb.

Murovdağ istiqamətində döyüşən Ramin yaralanıb hospitala gətirilib. Yaralı olmasına baxmayaraq, yenidən döyüş bölgəsinə əsgər yoldaşlarının yanına qayıdıb. Oktyabrın 19-da Murovdağ istiqamətində gedən döyüşlərdə qəhramanlıqla şəhid olub. Oktyabrın 20-də Ağdam rayonunda şəhidlər xiyabanında dəfn edilib. Ölümündən sonra Azərbaycan Respublikası Prezidentinin müvafiq sərəncamları ilə "Hərbi xidmətlərə görə", " Vətən uğrunda", " Kəlbəcərin azad olunmasına görə" medalları ilə təltif olunub.

Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərmiş, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək şəhid olmuş hərbi qulluqçu, Ramin Zeynalov Azərbaycan Respublikasının Prezidenti İlham Əliyevin Sərəncamına əsasən 3–cü dərəcəli “Vətənə xidmətə görə”  ordeni ilə təltif edilib.