Zülfüqarov Məlik Kamran

Mən Məlikə lap uşaqlıqdan həm ata, həm də ana olmuşam. Sağlam, tərbiyəli olması üçün əlimdən gələni elədim. Məlik çox ağıllı, dərrakəli, düzgün, halal uşaq idi. Orta məktəbdə yaxşı oxumasa da sakit, səliqəli, tərbiyəli olduğu üçün müəllimləri onu sevirdilər. Arıq da olsa güclü, qüvvətli idi Məlik. Fiziki işdən qorxmaz, çəkinməzdi. Uca boy idi. 190 santimetr boyu vardı. Rayonda Fövqaladə hallar idarəsində işləmək arzusunda idi. Deyirdim ki, əsgərliyi nizam-intizamla başa vur, tərifnamə ilə gəl, imtahan verib, işə qəbul olarsan. Məlikin sevimli məşğuliyyəti göyərçin saxlamaq idi. Çox sevirdi quşları. Yemləyir, yuva düzəldir, uçurdub arxasınca baxırdı. Hərbi xidmətə gedəndə də göyərçinlərimə yaxşı bax deyə tapşırmışdı mənə. Əvvəllər sevmədiyim quşlara indi onun əmanəti kimi baxıram. Məlik babasının adını daşıyırdı. Babası 1941-1945-ci illər Böyük Vətən müharibəsi iştirakçısı olub. Bizim məhləmiz onun adı ilə tanınır, Məlikli məhəlləsi, Məlikli küçəsi. Məlik həmişə uşaqlarla zarafatlaşanda fəxrlə deyərdi: Heç sizin adınıza küçə var? Mənim adıma var. İndi bizim küçəni Şəhid Məliyin adıyla nişan verirlər...(Qeyd: Şəhidin anası Ədilova Yeganə Şəhid ailəsi üçün nəzərdə tutulan 10000 manatı Silahlı Qüvvələrin Yardım Fonduna bağışlayıb. O, birdəfəlik yardımın Vətənimizin keşiyində duran əsgər və zabitlərə xərclənməsini daha düzgün hesab edərək, Şəhid ailələrinə göstərilən diqqət və qayğı üçün Prezidentə təşəkkür edib.)
Döyüş yoldaşı Tərlan Əzizov: Mən Məliklə N saylı hərbi hissədə təlimdə olarkən tanış olmuşam. Onunla mən eyni bölük və eyni taqımda olmuşuq. Sentyabrın 27-də müharibə başlayan zaman biz döyüşə yollandıq. Füzuli-Xocavənd istiqamətlərində gedən bütün döyüşlərdə son ana qədər biz bir yerdə döyüşmüşük. Sonuncu dəfə Füzulinin Ələsgərli kəndi yaxınlığındakı döyüşlərdə əsgər yoldaşlarını xilas edərkən, düşmən gülləsinə tuş gələrək şəhidlik zirvəsinə ucaldı. Zülfüqarov Məliyin ömür yolu bugünkü gənclərə əsl örnəkdir. Nə qədər ki, Azərbaycan xalqı var, belə oğulların əziz xatirəsi heç vaxt unudulmayacaq.