Qəza namazı

Bəli, əgər insan həddi-büluğa çatdıqdan sonra vacib namazlarını qılmayıbsa, həmin namazların qəzası onun öhdəsində qalır. Bu hökm həm kişiyə, həm də qadına aiddir.

Lakin insanın keçmiş illərdə neçə namaz qılmadığını dəqiq bilməsi vacib deyil. Əgər dəqiq say yadında deyilsə, qılmadığına əmin olduğu qədər qəza namazı qılması kifayətdir. Şübhəli və ehtimal olunan artıq miqdarı qılmaq vacib deyil.

Məsələn, bir kişi və ya xanım 45 yaşında namaza başlayıbsa və həddi-büluğdan etibarən namaz qılmayıbsa, həmin dövrdə qılmadığı vacib namazları tədricən qəza etməlidir. Bütün qəza namazlarını qısa müddətdə bitirmək məcburiyyətində deyil. İmkanı çatdığı qədər gündəlik namazlarla yanaşı qəza namazlarını da qılaraq zamanla öhdəsindən gələ bilər.

Qadınlar üçün mühüm qeyd: Heyz  günlərində qılınmayan namazların qəzası yoxdur. Buna görə xanım keçmiş qəza namazlarını hesablayarkən heyz müddətlərini nəzərə almalıdır.

Ən əsası isə insanın namaza başlaması böyük bir nemətdir. Keçmişə görə ümidsizliyə düşmək lazım deyil. İnsan səmimi tövbə edib bundan sonra namazlarını qoruyarsa və üzərində olan qəzaları imkan daxilində yerinə yetirərsə, Allahın rəhmətindən ümidini kəsməməlidir.

Allah heç bir bəndəsindən gücündən artıq bir şey istəmir. Əsas odur ki, insan bu gündən etibarən namazını tərk etməsin və keçmiş borclarını imkan daxilində tədricən ödəsin.