Ali-İmran Surəsi • Təfsiri-Nümunə • Bölüm 38
Ali-İmran surəsi, 62 və 63-cü ayələr
Ali-İmran surəsi, 62 və 63-cü ayələr
إِنَّ هَذَا لَهُوَ الْقَصَصُ الْحَقُّ وَمَا مِنْ إِلَهٍ إِلَّا اللَّهُ وَإِنَّ اللَّهَ لَهُوَ الْعَزِيزُ الْحَكِيمُ .٦٢
فَإِنْ تَوَلَّوْا فَإِنَّ اللَّهَ عَلِيمٌ بِالْمُفْسِدِينَ .٦٣
Ayələrin tərcüməsi
62\. Bu, (İsa barəsində) həmin doğru olan hekayədir. (Onun tanrı və ya Allahın oğlu olması kimi iddiaların heç bir əsası yoxdur.) Tək olan Allahdan başqa heç bir məbud yoxdur. Allah yenilməz qüvvət, hikmət sahibidir!
63\. Əgər onlar (bütün bu dəlillərə baxmayaraq, yenə də haqqı qəbul etməkdən) üz döndərsələr, (bil ki, haqq axtarışında deyildirlər və) Allah fitnə-fəsad törədənlərdən xəbərdardır!
Ayələrin təfsiri.
Həqiqi hekayətlər.
Həzrət İsanın (ə) həyat hekayəsi barədə bəzi izahlar veriləndən sonra bu ayələrdə daha çox təkid etmək üçün buyurur: “Bu, (İsa barəsində) həmin doğru olan hekayədir".
Nə onun tanrı olması iddiasını edənlərin sözü, nə də onu Allahın qeyri-qanuni oğlu sayanların – bu iddiadan Allaha sığınırıq – iddiaları düzdür. Haqq sənin gətirdiklərin və sənin dediklərindir. O, Allahın ilahi möcüzə ilə atasız, pak anadan dünyaya gəlmiş bəndəsi və elçisidir.
Daha artıq təkid etmək üçün bir daha buyurur: “Tək olan Allahdan başqa heç bir məbud yoxdur”.
“Allah yenilməz qüvvət, hikmət sahibidir!” Atasız uşağın doğulması Onun qüdrəti müqabilində elə də mühüm məsələ deyil.
Şübhəsiz, başqası deyil, məhz belə olan kəs ibadətə layiqdir.
Ayənin ərəbcə orijinalında işlənmiş (qəsəs) sözü tək isimdir və onun mənası “hekayət”dir. Onun kökü (qəssə) sözüdür və onun mənası “bir şeyi axtarmaq”dır. Məsələn, Musa ibn İmranın (ə) hekayətində belə oxuyuruq:
"(Anası Musanın) bacısına: “Onun dalınca get!" - dedi".
Birinin qanının alınmasına (qisas) deyilməsinin səbəbi onda qan sahibinin haqqının axtarılmasıdır. Ərəblər keçmişdəkilərin vəziyyət və həyat macəralarının axtarılıb araşdırılmasından ibarət hekayət və tarixə də (qissə) deyirlər.
Ayədəki "bu" işarə əvəzliyi Qurani-Kərim və ya peyğəmbərlərin tarixinə deyil, Həzrət İsanın (ə) hekayətinə işarədir.
Sonrakı ayədə həqiqətləri qəbul etməkdən boyun qaçıran şəxsləri təhdid edərək buyurur: "Əgər onlar (bütün bu dəlillərə baxmayaraq, yenə də haqqı qəbul etməkdən) üz döndərsələr, (bil ki, haqq axtarışında deyildirlər və) Allah fitnə-fəsad törədənlərdən xəbərdardır!”.
Əlbəttə, Quranın Həzrət İsa (ə) barəsindəki bu qədər məntiqi dəlilindən, həmçinin mübahilə çağırışından geri çəkiləndən sonra yenə haqqa təslim olmayıb inadkar söhbətlərini davam etdirən şəxslər haqq axtarışında deyildirlər, fitnəkardırlar və onların məqsədi insanların düzgün etiqadında süstlük yaratmaqdır. Şübhəsiz, Allah onları tanıyır, niyyətlərindən xəbərdardır və vaxtı çatanda onları cəzalandıracaq.
