SonÜmid TV - İslam Maarif, Dua və Ziyarət Portalı

İmam Hüseyn (ə) 21.01.2025

Bilirsiz, məzluma ağlamaq zalimə etirazdır…?

Bilirsiz, məzluma ağlamaq zalimə etirazdır…? İmam Hüseynə (ə) əza saxlamaq və ağlamaq yezid, müaviyə və onları iş üzərinə gətirən xəlifələrə, yəni Əhli-Beytə (ə) zülmün binasını qoyanlara etirazdır. Bu zülmə susan yüzlərlə səhabə və tabeinə etirazdır. Buna görə də vəhabi və sələfilər ağlamağı kökündən baltalamağa çalışırlar ki, ağlasalar işin ucu gedib lap yuxarılara çıxacaq. Axı ağlasalar, onlardan soruşacaqlar ki, kimə və niyə ağlayırsız? Onda gərək onlar Yezidə güclə beyət alan Müaviyəni, Müaviyəni Şama vali təyin edən Öməri də sorğulasınlar. Gərə desinlər ki, Əbu Süfyan və övladları boyunlarında qılınc görməyincə İslamı qəbul etmədilər və Peyğəmbər (s) də bu münafiqlərə hər hansısa bir vəzifənin verilməsini qadağan etmişdi, amma Ömər özündən daha güclü gördüyü müxalif münafiqləri susdurmaq üçün Peyğəmbərin (s) sözündən çıxaraq onlara vəzifə payladı. Nəticədə münafiqlər Ömər və Osmanın dövründə Şamda hakimiyyətlərini gücləndirdilər. İmam Əli (ə) münafiqləri vəzifədən kənarlaşdırmaq istəyərkən isə dişlərini müsəlmanların malına qıcamış Əbu Süfyan övladlarının qoşunları ilə üzləşdi… Bəli, bu münafiqin qoşunun yaradılmasına görə məsuliyyəti birbaşa ikinci xəlifə daşıyırdı. Əgər o, Əbu Süfyanın oğlu Yezidə Şam valiliyini verməsəydi, Yezidin qardaşı Müaviyə və daha sonra da məlum və məlun Yezidə zorla beyət alınmasaydı, Siffeyn döyüşü baş verməzdi, İmam Əli (ə) terror edilməz, İmam Həsən (ə) zəhərlə qətlə yetirilməz və Kərbəla faciəsi yaranmazdı və əməvi hakimiyyəti zamanı minlərlə müsəlman Əhli-Beyti (s) sevdikləri və zalimə etirazları üçün qətliam edilməzdilər. Bu ağlamağın ucu çox həssas yerlərə toxunduğu üçün münafiq Əbu Süfyanın və əməvilər sülaləsinin ideoloji tör-töküntüləri olan vəhabilər çox həyasızcasına İmam Hüseynin (ə) İslam uğurunda cihadını kiçiltmək istəyir, bunu xilafətə qarşı üsyan kimi göstərməyə çalışırlar. Çünki yezidə oxuduqları lənətin sonundan çox qorxular. Yezidə oxuduqları lənəti sanki öz əqidələrinə oxuyurlamış kimi diskinirlər… təbiidir. Hüseynə (ə) ağlamaq, Bədr və Ühüd döyüşündə şəhid olanların qanının qiymətini qorumaq üçündür. Hüseynə (ə) ağlamaq Peyğəmbərin (s) vəfatından sonra beş-on nəfərin mürtəd olması bəhanəsi ilə qəsbkar xəlifəyə etiraz edən müsəlmanların qətliamını (rəddə döyüşləri) unutmamaq üçündür. Hüseynə (ə) ağlamaq İslamın Quran əsasında inkişaf edəcəyi birinci yüz illiyin xristian və yəhudi nağılları ilə dolduranları unutmamaq üçündür. Hüseynə (ə) ağlamaq İmam Əlini (ə), Həzrət Zəhranı, İmam Həsəni və İmam Hüseyni (ə) və Əhli-Beyt (ə) imamlarını öldürən münafiqləri tanımaq üçüdür. Hüseynə (ə) ağlamaq bu günə qədər müsəlmanların məzlumcasına öldürülməsinin səbəbkarlarını, bu gün də həmin səbəbkarların yolunu davam edərək düşmən dəyirmanına su tökən Səudiyyə, Misr, BƏƏ və Bəhreyn kimi ərəb dövlətlərinin müsəlmanlara qarşı xəyanətlərini unutmamaq üçündür. Hüseynə (ə) ağlamaq xəyanətlər nəticəsində tanınmaz hala salınmış İslama ağlamaqdır. t.me/mirmehemmed_beshir

1 Oxu

İmam Hüseyn (ə) 21.01.2025

Kərbəlada İmam Hüseyni (ə) şəhid edənlər Ömər bin Xəttab qurduğu KUFƏ şəhərində yaşayan şiələr deyil, arvad minən dəvənin dalına düşüb İmam Əliyə (ə) CƏMƏL döyüşündə qılınc çəkənlərin qalıqları idi

Kərbəlada İmam Hüseyni (ə) şəhid edənlər Ömər bin Xəttab qurduğu KUFƏ şəhərində yaşayan şiələr deyil, arvad minən dəvənin dalına düşüb İmam Əliyə (ə) CƏMƏL döyüşündə qılınc çəkənlərin qalıqları idi. P.S: Kufə şəhəri 15-19-cu hicri-qəməri illəri arasında Ömər bin Xəttabın göstərişi əsasında hərbi şəhərcik olaraq tikildi. Paytaxt Mədinə ilə müharibə meydanları arasında yerləşən bu şəhərə İslam xilafətinin hər yerindən insanlar toplaşmışdı. Onların arasında Əhli-Beytə (s) sədaqətləri ilə tanından yəmənlilər də çox idi. Amma bu, Kufənin mütləq şəkildə şiə şəhəri olması demək deyildi. İmam Əli (ə) Cəməl döyüşünə Kufədən hərəkət edəndə başında 1000 nəfər əslən Mədinə şəhərindən olan xüsusi döyüşçü var idi. İmam Əli (ə) şəhid edildikdən sonra şiələr Kufədə Süfyanilər (müaviyə) hakimiyyəti tərəfindən sıxışdırıldılar. Şiələrin çoxu Kufədən qaçıb xilafətin müxtəlif şəhərlərinə pərakəndə olmuş və gizli yaşayırdılar. İmam Hüseynə (ə) məktub yazanlar isə “osmani” və “süfyani” sülaləsinin vücuda gətirdiyi kafir yezidin hakimiyyətini qəbul etmək istəməyən ümumi müsəlmanlar (öməri və ələvi) idilər. Onların əksəriyyəti İMAMƏT və VİLAYƏT məsələsini Peyğəmbərin (s) dediyi kimi qəbul etməmişdilər. Sadəcə xilafət üçün axtardıqları yeganə ədalətli namizəd Əhli-Beytdən olan İmam Hüseyn (ə) idi. Amma iş çətinə düşən məqamda Əbu Bəkr, Ömər və Osmanın yetişdirdiyi bu müsəlmanlar İmam Əlini (ə) tək qoyduqları və İmam Həsənə (ə) xəyanət etdikləri kimi İmam Hüseyni (ə) də tək qoyaraq xəyanət yolunu tutdular. Sonra da Süfyani və Əməvi hakimlərinə nökərlik edən səhabə, tabei və mühəddislər Kufə əhlini xəyanətkar, vəfasız və yalançı adandırdılar ki, İmam Əlinin (ə) və Əhli-Beytin (ə) fəzilətlərini yayan ravilərə zərbə endirsinlər, Əhli-Beytin (ə) fəzilət hədisləri yayılmasın. t.me/mirmehemmed_beshir

0 Oxu

İmam Hüseyn (ə) 20.01.2025

Aşura inqilabının əsas fəlsəfəsi: İMAMƏT və VİLAYƏT

Aşura inqilabının əsas fəlsəfəsi: İMAMƏT və VİLAYƏT Aşuradakı zülm Səqifədən və şayəd də daha öncədən başlamışdı. Buna görə Peyğəmbər (s) hər fürsətdə İmam Əlinin (ə) imaməti və vilayəti məsələsinə (vəsi, vəzir, xəlifə) toxunurdu və hər bir məsələdə onun bu işə (imamət, vilayət və ilahi xilafət) ən layiqli olduğunu önə çəkirdi. Aşuranın da əsas hədəfi Peyğəmbərin (s) arzusunu reallaşdırmaq, məcrasından çıxmış dini öz məcrasına qaytarmaq və müsəlmanların işlərini və xilafəti İlahi tərəfindən təyin edilmiş məsum rəhbərin ixtiyarına verilməsi idi. Buna görə də Peyğəmbərdən (s) sonra baş verən hadisələrdə və Kərbəla qiyamı günlərində məsumlar və Əhli-Beytin (ə) məşhur simaları tərfindən edilən çıxışları diqqətlə incələsəniz görəcəksiniz ki, bu çıxışların hamısı Həzrət Peyğəmbərin (s) Qədir-Xum xütbəsinin üzərində fokuslanıb və həmin xütbənin davamıdır. O cümlədən, Həzrət Zəhranın (ə) məlum hadisələrdəki çıxışları (Fədəkiyyə xütbəsi), İmam Əlinin (ə) hadisələr baş verən zamanda, 6 nəfərlik şurada və xilafət dövründəki bir çox xütbələri, İmam Həsənin (ə) sülh macərası, İmam Hüseynin (ə) beyət etməməsi, İmam Hüseynin (ə) Mina xütbəsi, Ərəfə duası, Mədinədən Kərəblaya qədərki söhbətləri, Həzrət Zeynəbin (s) Kufə və Şamda xütbəsi və İmam Zeynül-Abidinin (ə) Şam xütbəsi və digər bu kimi çıxışların hamısı bir nöqtəyə vurur: İMAMƏT və VİLAYƏT. Çünki imamət və vilayətdən uzaq düşmüş insanlar həqiqətdə nübüvvət və risalətdən və nəticədə Allahdan uzaq düşüblər. Buna görə də düşünürəm ki, Məhərrəm və Səfər aylarının mənbərlərinin əsas mövzusu İMAMƏT olmalıdır. İnsanlara İMAMƏT və VİLAYƏT məsələsi dəqiq izah edilməli və bu məsələnin zəruriliyindən danışılmalıdır. AŞURA mənbərləri ariflərinin yuxusunu danışmaq və həmişə danışlan əxlaqi mənbərlər üçün deyil, bu mənbərlərdə məhz İMAMƏT və vilayətdən danışmalıdır. AŞURA hərəkatı üçün müxtəlif fələsəfələr (əmr be məruf və sair kimi) deyiblər, danışıblar və bu mövzuda çıxışlar davam edir, bunlar öz yerində. Amma Kərbəla inqilabının əsas hədəfi Peyğəmbərin (s) vəfatından sonrakı 50 ildə dinin əsas məcrasından azdırılmış insanların İMAMƏT və VİLAYƏT məktəbinə geri qaytarılması idi və bu gün də bundan danışmalı və bu məsələ Həzrət İmam Mehdinin (ə) zühuru məsələsinə calaq edilməlidir. Çünki düşmən də bu gün əsasən bunu (Əhli-Beytin vilayət və imaməti) bizdən almağa və cavanlarımızı min hiylə ilə bu məktəbdən uzaqlaşdırmağa və ya bu məsələdə onları təhrifə çəkməyə çalışır. Mirməhəmməd Bəşir t.me/mirmehemmed_beshir

1 Oxu

İmam Hüseyn (ə) 20.01.2025

İmam Hüseynin (ə) İmam Səccada (ə) son vəsiyyəti

Möminə əziyyət vermək – dinimizin nəzərinə görə, böyük günahdır. Möminin qəlbini sındırmaq olmaz. Çünki Allah mömini o qədər sevir ki, onun haqqını Kəbənin haqqından daha üstün tutur. O zaman ki, qəlb sınar, onun bərpa olması asan olmaz. Ona görə də hər bir insan dilinə nəzarət etməli və heç kəsin qəlbini sındırmamalıdır. Çünki həmin qəlbi düzəltmək çətin bir işdir. Hər kim möminin qəlbini sındırar – tövbə etməsi kifayət etməz. Gərək həmin insandan halallıq alsın. Hədislərin birində oxuyuruq ki, Allah Təala buyurur: “Qəlbi sınmış insan Allah dərgahında xüsusi məqama malikdir və Allahın diqqətində qərar tutur. Ürəyi sınan insanın nifrin və dua etməsi tez həyata keçər”. İnsan qəlibini sındıra bilən rəzil sifətlərdən biri də kinayəli sözlər və insanları dili ilə sancmaqdır. Həm dinimiz, həm də ürf bu əməli bəyənmir, əksinə onu məzəmmət edir. Əgər insan yersiz yerə elə söz deyər ki, başqasının qəlbinin sınmasına səbəb olar – o, kəbirə günah edər və bu əməlin cəzası ağır olar. Həmçinin bu əməli ilə həmin şəxsə zülm etmiş olar. Dinimiz buyurur ki, heç kəsə zülm etməyin. Əgər kimsə zülm yolu ilə başqalarının haqqını tapdalayarsa, məzlumun ahından amanda qalmaz. İmam Səccad (ə) buyurur: “Atam ömrünün son anlarından damarlarından qan axa-axa məni qucaqladı və buyurdu: “Sənə atamın ölən zaman mənə buyurduqlarını vəsiyyət edirəm. Əziz oğlum! Allahdan başqa yavəri olmayana zülm etməkdən çəkin!””. (Hədənə/Deyerler.org/) Bu hədis bizlərə xəbərdarlıq edir ki, insanlara zülm etmək böyük günahdır. Ona görə də hər bir insan dilinə nəzarət etməlidir.

1 Oxu

İmam Hüseyn (ə) 20.01.2025

İmam Hüseynin (ə) kəramət dəryasından bir neçə damla

mam Hüseyn (ə) Əhli-Beytin (ə) beşinci üzvü və müsəlmanların üçüncü İmamıdır ki, Peyğəmbərə (s) sima və sünnət baxımından ən çox bənzəyən insan olmuşdur. Gecələri Həzrətin (ə) ətrafında xüsusi nur peyda olardı ki, insanlar onu gecə vaxtı bu nurla tanıyardılar. Həzrətin (ə) həyatı boyu etdiyi çox sayda kəramətlər vardır ki, onlardan bəzisinə işarə edək. Raşid ibni Yəzid nəql edir: “Məkkədən Kufənin yaxınlığına qədər İmam Hüseynlə (ə) birlikdə idim. (Yolda gedən zaman) gördüm ki, sancan vəhşi heyvan ona üzünü çevirdi və onunla söhbət etdi. Həzrət (ə) ona tərəf üzünü çevirib dayandı və o heyvanla uzun söhbət etdi”. Kəsir ibni Şazan nəql edir: “İmam Hüseynin (ə) xidmətində idim ki, oğlu Əli Əkbər ondan üzüm istədi. Həzrət (ə) əlini məscidin divarına vurdu, (oradan) üzüm və mouz (banan) çıxartdı və ona yedizdirdi”. (Tebyan/Deyerler.org/) İmam Sadiq (ə) hədislərin birində nəql edir: “İmam Hüseyn (ə) səfər edən zaman qurumuş xurma ağacının altında dayanır. Dua edir və ağac yaşıllaşır. Yarpağı və xurması meydana gəlir. Ağacın üstünə çıxıb, kifayət qədər ondan yedilər”. Ərəblərdən biri İmam Hüseynə (ə) deyir: “Ya ibni Rəsulallah! Dəvəmi itirmişəm və ondan başqa dəvəm yoxdur. Atan itən dəvələri tapırdı”. İmam (ə) buyurur: “Filan məkana get, dəvəni görəcəksən. Dayanmışdır və qarşısında da qara canavar vardır”. Ərəb həmin tərəfə gedir və qayıdır. İmama (ə) deyir: “Dəvəmi həmin yerdə tapdım”. Həbabə nəql edir: “Mən İmam Hüseyni (ə) görməyə getmişdim və gözümün ətrafında yara çıxmışdı. Bu hal məni narahat edirdi. Ona görə də bir neçə gün Həzrəti (ə) görməyə gəlməmişdim. Həzrət (ə) mənə buyurdu: “Ey Həbabə! Niyə mənim yanıma gəlmirsən?”. Səbəbini dedim və Həzrət (ə) mübarək ağız suyundan götürüb, yaranın üstünə sürtdü və buyurdu: “Ey Həbabə! Allaha şükür et ki, o səbəbi səndən uzaqlaşdırdı”. Səcdəyə düşdüm. Və mənə buyurdu: “Ey Həbabə! Başını qaldır və aynaya bax”. Başımı qaldırdım və (yaradan) heç bir əsər görmədim. Allaha şükür etdim”.

1 Oxu

İmam Hüseyn (ə) 20.01.2025

İmam Hüseyn əleyhissalam və ailə

İnsan ictimai varlıqdır, odur ki, heç bir insan təkbaşına və təşkilatsız yaşaya bilməz. Təşkilat və quruluşların hansının ən mühüm və daha lazım olması barədə müxtəlif nəzərlər vardır. İslam dininə görə Allah yanında ən sevimli və ən əziz quruluş ailə quruluşudur. Sonuncu peyğəmbər həzrət Muhəmməd səllAllahu əleyhi və alih buyurur: İslama görə evli (ailəli) insanın qıldığı iki rəkət namaz subay adamın qıldığı namazdan yetmiş dəfə üstündür. Başqa bir hədisdə imam Cəfər Sadiq əleyhissalam buyurur: İslam dininin İlahi göstərişlərinə ilk əməl edənlər həzrət Muhəmməd (s) və o həzrətin Əhli-beyti (ə) olmuşlar. Odur ki, məsum rəhbərlər (onların hamısına Allahın salamı olsun) Allaha və axirət gününə inananlar üçün ən gözəl nümunə və örnəkdirlər. İmam Hüseyn (ə) da o məsum rəhbərlərdən biridir. O həzrət ailəcanlı və ailəsinə sadiq olmaqda zamanın nümunəsi idi. İmam Hüseyn əleyhissalam buyurur: Rübab imam Hüseyn əleyhissalamın həyat yoldaşı, Səkinə isə imam Hüseynin (ə) qızıdır. Fikir verin, dostlar, imam Hüseyn (ə) ailəsini o qədər çox sevir ki, onlar yaşayan ev İmamın sevimlisinə çevrilir. Bu hədisdə sevginin istiqamətinin evə təyin edilməsinin mənası budur ki, həmin evdə olan Rübab və Səkinəyə olan sevgi bütün evi, yəni evin içini də çölünü də imam Hüseyn (ə) əleyhissalam üçün sevimli etmişdir. Həmçinin imam Hüseyn əleyhissalam Kərbəla hərəkatı zamanı Aşura gecəsi söylədiyi məşhur çıxışında buyurub: Odur ki, imam Hüseyn əleyhissalam hamımız üçün nümunədir, bəs biz özümüzü o həzrətə oxşada bilmişikmi? Biz həyat yoldaşımız və ailəmizi sevirikmi? Ailəsini və evini sevən insan hər gecə saat 12 və ya 1-ə qədər çayxanalarda vaxtını boşuna keçirməz, zəruri işləri olmadığı təqdirdə evinə tez çatmağa can atar. Bax, bu, İslamın və məsum rəhbərlərin (onların hamısına Allahın salamı olsun) evlilik və ailəyə verdiyi dəyərdir. Amma təəssüf ki, hazırkı zamanda imperializmin təbliğat maşınları tərəfindən gecə-gündüz ailə quruluşuna və evliliyə qarşı güclü təbliğatlar gedir. Onlar evlənməni azadlıqdan məhrum olmaq, asılılıq və problemlərin qaynağı kimi təqdim edirlər ki, təki ailələr dağılsın, insanlar tüfeyli və məsuliyyətsiz olsunlar, düşmənlər də çox rahatlıqla insanları ehtiras, qəzəb və şeytanın əsirinə çevirə bilsinlər. Əxlaqsızlıq, həyasızlıq, günah və pislikləri yaymaqla cəmiyyətlərin vəhdət və birliyini sındırsınlar, cəmiyyətin fərdləri arasında ixtilaf və düşmənçilik toxumları səpsinlər. ما بني في الاسلام بناء أحبّ إلي اللَّه عزّوجلّ و أعزّ من التّزويج “İslam dininə görə heç bir bina və quruluş Allah yanında evlənmməkdən daha sevimli deyil.” (Məkarimul-əxlaq 196-cı səhifə) إن الله عز وجل يحب البيت الذي فيه العرس “Allah Taala o evi sevir ki, həmin evdə gəlin (və toy) olsun.” (əl-Kafi 6-cı cild 54-cü səhifə) احب بيتا فيه رباب و سكينه “Rübab və Səkinə olan evi mən çox sevirəm. و لا اهل بيت ابر و لا اوصل من اهل بيتي “Mən öz ailəmi ən yaxşı və ən mehriban ailə bilirəm.” Rza Əzizoğlu İrəvani

1 Oxu

İmam Hüseyn (ə) 20.01.2025

Peyğəmbərdən (s) İmam Hüseynin (ə) fəziləti haqda 12 hədis

1. İmam Hüseyn (ə) buyurur ki, Peyğəmbəri-Əkrəmin (s) otağına daxil olduqda gördüm ki, Übəyy ibn Kə`b də o həzrətin hüzurundadır. Peyğəmbəri-Əkrəm (s) mənə buyurdu: فَقَالَ لِي رَسُولُ اللهِ (ص) مَرْحَبًا بِكَ يَا اَبَا عَبْدِ الله، يَا زَيْنَ السَّمٰوَاتِ وَ الْأَرَضِينَ! قَالَ لَهُ اُبَيٌّ: وَ كَيْفَ يَكُونُ يَا رَسُولَ اللهِ (ص) زَيْنُ السَّمٰوَاتِ وَ الْأَرَضِينَ اَحَدٌ غَيْرُكَ؟ قَالَ: اُبَيُّ وَ الَّذِي بَعَثَنِي بِالْحَقِّ نَبِيًّا إِنَّ الْحُسَيْنَ بْنَ عَلِيٍّ فِي السَّمَاءِ أَكْبَرُ مِنْهُ فِي الْأَرْضِ، وَ إِنَّهُ لَمَكْتُوبٌ عَنْ يَمِينِ عَرْشِ اللهِ عَزَّ وَ جَلَّ: مُصْبَاحُ هُدًي وَ سَفِينَةُ نَجَاةٍ “Ey Əba-Əbdullah, xoş gəlibsən, ey göylərin və yerlərin zinəti!” Übəyy, Peyğəmbəri-Əkrəmdən (s) soruşdu: “Ey Allahın Rəsulu (s)! Səndən başqası da göylərin və yerlərin zinəti ola bilərmi?!” Peyğəmbəri-Əkrəm (s) buyurdu: “Ey Übəyy, məni haqq olaraq peyğəmbərliyə seçən Allaha and olsun, Hüseynin göydə olan məqamı yerdə olan məqamından üstündür və həqiqətən, ərşin sağ tərəfində yazılıb: “Hüseyn hidayət çırağı və nicat gəmisidir!” 2. Peyğəmbəri-Əkrəm (s) buyurub: الْحَسَنُ وَالْحُسَیْنُ اِمامانِ قاما اَوْ قَعَد “Həsənlə Hüseyn qiyam etsələr də, etməsələr də, imamdırlar.” 3. Peyğəmbəri-Əkrəm (s) buyurub: ان الحسن و الحسين هما ريحانتاى من الدنيا من احبنى فليحبهما “Sözsüz, Həsənlə Hüseyn dünyada mənim iki gülümdür. Məni sevənlər onların hər ikisinə məhəbbət bəsləməlidirlər.” 4. Peyğəmbəri-Əkrəm (s) buyurub: اِنَّ لِلْحُسَيْنَ مَحَبَّةً مَكْنُونَةً فِي قُلُوبِ الْمُؤْمِنِينَ “Həqiqətən, möminlərin qəlbində Hüseynə gizli məhəbbət vardır!” اِنَّ لِلْحُسَيْنِ فِي بَوَاطِنِ الْمُؤْمِنِينَ مَعْرِفَةً مَكْنُونَةً “Həqiqətən, möminlərin qəlblərində Hüseynlə gizli tanışlıq vardır!” اِنَّ لِقَتْلِ الْحُسَيْنِ (ع) حَرَارَةً فِي قُلُوبِ الْمُؤْمِنِينَ لَا تَبْرَدُ اَبَدًا “Möminlərin qəlbində Hüseynin qətlinə görə bir hərarət vardır ki, heç vaxt soyumayacaq!” 5. Peyğəmbəri-Əkrəm (s) buyurub: حُسَيْنٌ مِنِّي وَ اَنَا مِنْ حُسَيْنٍ، اَحَبَّ اللهَ مَنْ اَحَبّ َحُسَيْنًا “Hüseyn məndəndir, mən də Hüseyndənəm. Hüseyni sevəni Allah da sevir!” 6. Peyğəmbəri-Əkrəm (s) buyurub: …وَ هُوَ سَيِّدُ شَبَابِ اَهْلِ الْجَنَّةِ وَ بَابُ نَجَاةِ الْأُمَّةِ، اَمْرُهُ اَمْرِي وَ طَاعَتُهُ طَاعَتِي، مَنْ تَبِعَهُ فَإِنَّهُ مِنِّي وَ مَنْ عَصَاهُ فَلَيْسَ مِنِّي “…O (Hüseyn) behişt gənclərinin sərvəri, ümmətin nicat qapısıdır. Onun əmri mənim əmrim, ona itaət mənə itaətdir. Onun yolu ilə gedən məndəndir, ona qarşı çıxan isə məndən ayrıdır!” 7. Peyğəmbəri-Əkrəm (s) buyurub: مَنْ اَحَبَّ اَنْ يَنْظُرَ اِلـٰي اَحَبِّ اَهْلِ الْاَرْضِ اِلـٰي اَهْلِ السَّمَاءِ فَلْيَنْظُرْ اِلَي الْحُسَيْنِ “Kim yer əhli içərisində səma əhlinin yanında ən sevimli olan kəsə tamaşa etmək istəyirsə, Hüseynə baxsın!” 8. Hüzəyfə ibn Yəmani, Peyğəmbəri-Əkrəmin (s) Hüseyn ibn Əli (ə) haqqında belə buyurduğunu nəql edir: يَا اَيُّهَا النَّاسِ، هٰذَا الْحُسَيْنُ بْنُ عَلِيٍّ فَاعْرِفُوهُ فَوَ الَّذِي نَفْسِي بِيَدِهِ، إِنَّهُ فِي الْجَنَّةِ وَ مُحِبِّيهِ فِي الْجَنَّةِ وَ مُحِبِّي مُحِبِّهِ فِي الْجَنَّةِ “Ey insanlar, bu Əli oğlu Hüseyndir, onu tanıyın! And olsun canım ixtiyarında olana (Allaha)! Həqiqətən, onun (Hüseyn) yeri cənnətdir, onu sevənlər və onu sevənləri sevənlərin də yeri cənnətdir.” 9. Peyğəmbəri-Əkrəm (s) buyurub: …وَ بِالْحُسَيْنِ تَسْعَدُونَ وَ بِهِ تَشْقُونَ، اَلٰا اِنَّمَا الْحُسَيْنُ بَابٌ مِنْ اَبْوَابِ الْجَنَّةِ، مَنْ عَادَاه حَرَّمَ اللهُ عَلَيْهِ رَائِحَةَ الْجَنَّةِ “İnsanlar Hüseynin vasitəsilə xoşbəxt və bədbəxt olarlar (o həzrətin yolunu tutanlar xoşbəxt, ona qarşı çıxanlar isə bədbəxtdir). Agah olun ki, həqiqətən, Hüseyn cənnət qapılarından biridir və Allah onunla düşmənçilik edənə cənnətin ətrini haram edər.” 10. Xanım Fatimeyi-Zəhradan (s.ə) belə nəql olunur: دَخَلَ اِلَيَّ رَسُولُ اللهِ (ص) عِنْدَ وِلَادَةِ الْحُسَيْنِ (ع)، فَنَاوَلْتُهُ إِيَّاهُ فِي خِرْقَةٍ صَفْرَاءَ. فَرَميٰ بِهَا وَ أَخَذَ خِرْقَةً بَيْضَاءَ وَ لَفَّهُ فِيهَا ثُمَّ قَالَ: خُذِيهِ يَا فَاطِمَةُ فَإْنَّهُ اِمَامٌ ابْنُ اِمَامٍ، أَبُو الْأَئِمَّةِ التِّسْعَةِ، مِنْ صُلْبِهِ اَئِمَّةُ اَبْرَارٍ وَ التَّاسِعُ قَائِمُهُمْ “Hüseynin anadan olduğu gün Allah Rəsulu (s) evimizə gəldi. Sarı parçaya bükülmüş uşağı ona verdim. O, sarı parçanı kənara ataraq uşağı ağ parçaya büküb dedi: “Ey Fatimə, al (bu) uşağı. O, imam və imam övladı, doqquz pak və məsum imam atasıdır və onların doqquzuncusu Qaimdir (imam Məhdi (əc.)).” 11. Bərra ibn Azib belə nəql edir: رَأَيْتُ رَسُولَ اللهِ (ص) حَامِلَ الْحُسَيْنِ (ع) وَ هُوَ يَقُولُ: “اَللّـٰهُمَّ اِنِّي اُحِبُّهُ فَاَحِبَّهُ “Gördüm ki, Allah Rəsulu (s) Hüseyni qucağına alıb deyir: “Pərvərdigara, mən onu sevirəm, Sən də onu sev!” 12. Peyğəmbəri-Əkrəm (s) xanım Fatimeyi-Zəhraya (s.ə) buyurub: كُلُّ عَيْنٍ بَاكِيَةٌ يَوْمَ الْقِيَامَةِ اِلَّا عَيْنٌ بَكَتْ عَليٰ مُصَابِ الْحُسَيْنِ، فَإِنَّهَا ضَاحِكَةٌ مُسْتَبْشِرَةٌ بنعيم الْجَنَّة “Qiyamət günü Hüseynin müsibətinə ağlayan gözdən başqa, bütün gözlər ağlayacaq. Ona ağlayan göz (qiyamətdə) cənnət nemətləri ilə şad və xürrəm olacaqdır.” Rza Şükürlü (Maide.az)

1 Oxu

İmam Hüseyn (ə) 20.01.2025

Bu mövludda sevinclə göz yaşı bir-birinə qarışır.

Hər bir ailədə yeni körpə dünyaya gələn zaman sevincə və şadlığa səbəb olur. Ancaq Həzrət Peyğəmbərin (s) ailəsində dünyaya gələn bu ikinci körpə sevinclə bir yerdə özü ilə qəm də gətirmişdi. O, Seyyidi-şühəda olan İmam Hüseyndir (ə). İmam Rza (ə) nəql edir: “O zaman ki, İmam Hüseyn (ə) dünyaya gəlir, Həzrət Peyğəmbər (s) Əsma binti Əmisə buyurur: “Ey Əsma, övladımı mənə gətir!”. İmamı (ə) ağ parçaya büküb, Həzrətin (s) yanına gətirdilər. Həzrət (s) onu aldı və ətəyinə qoydu. Sağ qulağına azan və sol qulağına iqamə oxudu. Cəbrayil (ə) nazil olub dedi: “Allah Təala sənə salam göndərir və buyurur: “Əlinin (ə) sənə nisbəti Harunun Musaya (ə) nisbəti kimi olduğu üçün, onu Harunun kiçik oğlunun adı ilə adlandır. Sənin dilin ərəb dili olduğu üçün, onu Hüseyn adlandır”. Peyğəmbər (s) onu öpdü və ağladı. Buyurdu: “Sənin qarşıda böyük müsibətin vardır, Allah onu öldürənə lənət etsin”. Sonra buyurdu: “Ey Əsma! Bu xəbəri Fatiməyə (s.ə) demə”. Yeddinci gün olan zaman Peyğəmbər (s) gəldi və buyurdu: “Övladımı mənə gətir”. Körpəni Həzrətin (s) yanına aparan zaman onun üçün ağ və qara olan qoyunu əqiqə qurbanı olaraq kəsdi. Bir budunu doğum mamasına verdi. Başını qırxdılar, saçının ölçüsü qədər gümüş sədəqə etdi və başına xluq çəkdi. Onu ətəyinə qoyub, buyurdu: “Ey Əba Abdullah! Sənin öldürülməyin mənim üçün nə qədər də ağırdır”. Sonra çoxlu ağladı. Əsma dedi: “Atam-anam sənə fəda olsun, bu, nə xəbərdir ki, birinci gün də buyurdunuz, indi də deyirsiniz? Şadlanmaq yerinə ağlayırsınız?”. Həzrət (s) buyurdu: “Bu əziz övladım üçün ona görə ağlayıram ki, Bəni-Üməyyədən olan kafir dəstə onu öldürəcəkdir. Allah mənim şəfaətimi onlara çatdırmasın. Onu o insan öldürəcəkdir ki, dinimin pozulmasına səbəb olacaqdır. Böyük Allaha kafir olacaqdır. Allahım! Sənə bu iki övladın haqqına dua edirəm, o duanı ki, İbrahim (ə) zümrəsinin haqqında etmişdi. Allahım! Sən onları sev və onları sevənləri sev. Lənət et hər kim onları düşmən bilər, elə bir lənət ki, yeri və göyü doldursun””. İmam Sadiq (ə) buyurur: “O zaman ki, Həzrət İmam Hüseyn (ə) dünyaya gəlir, Cəbrayil (ə) Peyğəmbərə (s) nazil olur və deyir: “Sizin ümmətiniz sizdən sonra Hüseyni (ə) öldürəcəkdir. Onun türbətini sizə göstərimmi?”. Qanad çalıb bir qədər Kərbəla torpağından gətirdi və onu Peyğəmbərə (s) göstərdi. Sonra buyurdu: “Bu, o türbətdir ki, Hüseyn (ə) onun üzərində öldürüləcəkdir””. Bəli, bu, elə mövluddur ki, möminləri həm sevindirir və həm də Həzrətin (ə) çəkdiyi müsibətlərə görə göz yaşı tökməyinə səbəb olur. Salam olsun sənə, ey Şəhidlər Sərvəri! Mövludun mübarək, ey Əba Abdullah!/Deyerler.org/

1 Oxu

İmam Hüseyn (ə) 20.01.2025

Əhli-Beytdən (ə) olmayan Kərbəla əsirləri

Aşura hadisəsindən sonra ancaq Əhli-Beytin (ə) ailəsi və bəzi yoldaşları sağ qaldılar ki, qadınlardan, nökərlərdən və uşaqlardan ibarət idilər. Ömər ibni Səd (lən), İmam Hüseynin (ə) şəhadətindən sonra onun əzizlərini və o cümlədən, oğlu İmam Səccadı (ə) əsir edib, özü ilə Kufəyə apardı. Kərbəla vaqiəsindən sonra Əhli-Beyt (ə) əsirləri ilə yanaşı, başqa əsirlər də var idi ki, onlar da öz yaxınlarını şəhid vermişdilər. Şəhərlərinə daxil olan zaman, Kufə qəbilə başçılarının vasitəsilə azad olunmuşdular. Ancaq Haşimi əsirləri elə bu halda qalaraq, Şama aparılmışdılar. Əsirlərin bəzisi isə düşmən tərəfindən qətl edilmişdi. Əhli-Beytdən (ə) olmayan əsirlər ilə tanış olaq: 1. Uqbə ibni Səman. İmam Hüseynin (ə) xanımının nökəri olan Uqbə, İbni Səd (lən) tərəfindən əsir olur və sonra azad edilir. 2. Nafə ibni Həlal. O, Quran qarisi, hədis yazan və Əmirəl-möminin (ə) dostlarından olmuşdur. O, Müslimin şəhadətindən sonra İmam Hüseynə (ə) qoşulmuşdu. Aşura günü düşmənin 12 nəfərini cəhənnəmə göndərmişdi. Yaralandığı üçün döyüşü davam etdirə bilmir. Şimr (lən) də onu əsir götürür. Nafə əsirlikdən sonra Şimr (lən) tərəfindən qətl edilir. 3. Muvəqqə ibni Suməmə. O, Aşura hadisəsi zamanı ağır zərbə alır və yerə yıxılır. Qəbiləsi onu xilas edir. Onu Kufəyə gətirib gizlədirlər. İbni Ziyad (lən) bu hadisədən xəbər tutan zaman, onu öldürmək üçün adam göndərir. Ancaq Bəni-Əsədin bu işə qarışması ilə fikrindən daşınır. Onu zəncirə vurub, Zarəyə sürgün edirlər. 4. Sərar ibni Munəm. O, Aşura hadisəsi zamanı yaralanır və əsir düşür. Ömər ibni Səd (lən) onu öldürmək istəyir. Ancaq qəbiləsi buna mane olur. O, Aşura hadisəsindən 6 ay sonra dünyasını dəyişir. 5. Vəhəb ibni Vəhəb. O, xristian bir şəxs idi ki, anası ilə birlikdə İmam Hüseynin (ə) yanına gəlir və müsəlman olur. O, Aşura günü xeymənin sütununu çıxardıb, onunla düşmənə hücum edir və düşmənin bir neçə nəfərini cəhənnəmə vasil edir. Sonra isə əsir düşür. Onun başını kəsib, İmamın (ə) yoldaşlarına tərəf atırlar. 6. Ümmi Əmr. Ümmi Əmr öz həyat yoldaşı ilə birlikdə Kərbəla karvanına qoşulmuşdu. Əri və oğlu bu hadisə zamanı şəhid olur və o da, başqa qadınlar kimi əsir düşür. 7. Fizzə. O, xanım Zəhranın (s.ə) kənizi idi. O da başqa qadınlar kimi əsir düşür. 8. Ümmi Vəhəb. Kərbəlada bu ləqəbi daşıyan iki qadın olmuşdur. Onlardan biri Aşura günü şəhid olmuş və o birisi isə Şeyx Səduqun nəql etdiyinə görə, xristian qadın idi ki, oğlu ilə birlikdə İmam Hüseynin (ə) vasitəsi ilə müsəlman olmuşdular. O, da əsir düşmüşdür. (İslami saytlara istinadən/Deyerler.org/) Tarixin nəql etdiyinə görə, Əhli-Beytlə (ə) birlikdə çox sayda insan əsir düşmüşdür. O zaman ki, Həzrət Zeynəb (s.ə) İbni Ziyadın (lən) məclisinə daxil olur, əmr edir ki, kənizləri onu əhatəyə alsınlar. Ancaq bu kənizlərin adı tarixə məlum deyildir.

1 Oxu

İmam Hüseyn (ə) 20.01.2025

Kərbəla inqilabının carçısı

Qeyd etdiyimiz kimi İmam Səccad (əleyhissəlam) Kərbəla faciəsində iştirak etmiş, atasının şəhadətindən sonra Əhli-beyt əsirlərinin başında olmaqla inqilabın və İmam Hüseyn əleyhissəlamın qızılqanlı şəhadətinin carçısı olmuş, öz söhbət və çıxışları ilə Əməvi hakimiyyətinin çirkin üzünü tanıtdırmaq və camaatın fikrini oyatmaqla məşğul olmuşdur. Əməvi hökumətinin Müaviyyənin dövründən etibarən Peyğəmbər ailəsinin əleyhinə uzun-uzadı təbliğatlarını (xüsusən Şamda) nəzərə almaqla şübhəsiz ki, əgər Əhli-beyt əsirləri Əməvi hakimiyyətinin iç üzünü açaraq camaatın fikrini oyatmasaydılar, İslam düşmənləri və hökumət nümayəndələri İmam Hüseyn əleyhissəlamın böyük və həmişəyaşar inqilabını tarix səhifəsindən pozar və onun simasını dəyişdirərdilər. Ancaq İmam Səccad əleyhissəlamın və eləcə də, digər əsirlərin əsir olduqları müddətdə apardıqları təbliğat (qeyd etməliyik ki, bu fürsəti onlara Yezidin axmaqlığı və şəxsi düşmənçiliyi vermişdir) İmam Hüseyn əleyhissəlamın düşmənlərinə bu fürsəti vermədi və Yezidi hər yerdə rüsvay etdi.

1 Oxu

İmam Hüseyn (ə) 20.01.2025

İmama ilk dəfə növhə oxuyan şəxs

O, İmam Hüseynə (ə) rövzə oxumağın əsasını qoydu Bu, Aşura gününün günortasından çağlamağa başlayan qaynar bir bulaqdır. O zaman bir mənbəyə əsasən, Zeynəb-Kübra “Təll-Zeynəbiyyə”də – yəni Zeynəbiyyə yüksəkliyində Peyğəmbərə (s) müraciətlə belə dedi: “Ey Məhəmməd! Allahın salamı olsun sənə! Bu sənin Hüseynindir. O, qanına boyanıb, bədən üzvləri kəsilib…”. O, İmam Hüseynə (ə) rövzə oxumağın əsasını qoydu, gizli saxlamaq istədikləri hadisəni uca səslə dedi. İmamın bu böyük bacısı istər Kərbəlada, istər Kufədə, istərsə də Şam və Mədinədə uca səslə Aşura hadisəsini bəyan etdi. Bu bulaq o zamandan çağlamağa başladı və bu günə qədər də çağlayır. Bu, Aşura hadisəsidir.

1 Oxu

İmam Hüseyn (ə) 20.01.2025

İmam Hüseynin (ə) hərəmini ziyarət etmək – Peyğəmbərlə (s) birlikdə yerinə yetirilən qəbul olunmuş həccə bərabərdir

1. Pak məkandır. Həzrət Peyğəmbər (s) buyurur: “Kərbəla – yer üzünün ən pak türbəsidir. Ehtiram cəhətdən ən böyük türbəsidir. Kərbəla – behiştin döşəmələrindəndir”. 2. Nicat yeridir. Həzrət Peyğəmbər (s) buyurur: “Oğlum elə diyarda torpağa tapşırılacaqdır ki, ona Kərbəla deyərlər. Üstün yerdir ki, davamlı olaraq İslamın qübbəsi olacaqdır. Necə ki, Allah Həzrət Nuhun (ə) möminlərinə elə oradaca tufandan nicat vermişdi”. 3. Eşq yeridir. İmam Əli (ə) Kərbəla haqqında buyurur: “Bura aşiqlərin qurbangahı və şəhidlərin şəhid olduğu yerdir. Nə keçmiş şəhidlər və nə də gələcək şəhidlər onlara çatmazlar”. 4. Eşq ətri verir. İmam Əli (ə) Kərbəla torpağına xitab edərək, buyurur: “Necə də ətirlisən, ey torpaq! Qiyamət günü səndən elə insanlar qalxacaqdır ki, hesab vermədən behiştə daxil olacaqlar”. 5. Məhşərin qırmızı ulduzudur. İmam Səccad (ə) buyurur: “Kərbəla torpağı Qiyamət günü mirvari ulduz kimi parlayacaqdır və nida verəcəkdir ki, mən Allahın müqəddəs torpağıyam. Pak və mübarək torpaq ki, şəhidlərin rəhbərini və behişt cavanlarının sərvərini özündə qərar vermişdir”. 6. Kərbəla – beytul-müqəddəsdir. İmam Sadiq (ə) buyurur: “Kərbəla – beytul-müqəddəsin torpağındandır”. 7. Fərat və Kərbəla. İmam Sadiq (ə) buyurur: “Kərbəla torpağı və Fərat suyu – ilk torpaq və ilk su olmuşdur ki, Allah Təala onlara müqəddəslik bəxş etmişdir”. 8. Kərbəla – peyğəmbərlərin (ə) Kəbəsidir. İmam Sadiq (ə) buyurur: “Yerdə və göydə elə peyğəmbər yoxdur ki, Allahdan icazə alıb, İmam Hüseyni (ə) ziyarət etməyə gəlməsin. Necə ki, bir dəstə Kərbəlaya enən zaman, bir dəstə oranı tərk edər”. 9. Kərbəla, mələklərin sevimli yeridir. İmam Sadiq (ə) buyurur: “Yerdə və göydə elə mələk yoxdur ki, Allahdan icazə alıb, İmam Hüseynin (ə) ziyarətinə gəlməsin. Belə ki, davamlı olaraq Kərbəlaya mələklər dəstəsi enər və oradan başqa dəstə yuxarı qalxarlar”. 10. Behişt yoludur. İmam Sadiq (ə) buyurur: “İmam Hüseynin (ə) qəbrinin yeri – behişt qapılarından biridir”. 11. Kərbəla – əmin yerdir. İmam Sadiq (ə) buyurur: “Həqiqətən, Allah Məkkəni hərəm qərar verməzdən əvvəl, Kərbəlanı əmin və bərəkətli hərəm qərar vermişdir”. 12. Davamlı ziyarət. İmam Sadiq (ə) buyurur: “Kərbəlanı ziyarət edin və bu işə davam edin. Çünki Kərbəla Peyğəmbərin (s) ən üstün övladını ağuşunda qərar vermişdir”. 13. Mübarək məkan. İmam Sadiq (ə) buyurur: “Allahın Quranda yad etdiyi əmin-amanlı vadi sahili – Fəratdır. Bərəkətli yer isə Kərbəladır”. 14. Ziyarət şövqü. İmam Baqir (ə) buyurur: “Əgər insanlar bilsəydilər ki, İmam Hüseyn (ə) hərəmini ziyarət etməkdə nə qədər fəzilət vardır, ziyarət şövqündən ölərdilər”. 15. Qəbul olan həcc. İmam Baqir (ə) buyurur: “Allah Rəsulunun (s) qəbrinin ziyarəti, şəhidlərin qəbrini ziyarət etmək və İmam Hüseynin (ə) hərəmini ziyarət etmək – Peyğəmbərlə (s) birlikdə yerinə yetirilən qəbul olunmuş həccə bərabərdir”. 16. Yenidən doğulmaq kimi halət. Həmran nəql edir ki, İmam Hüseyni (ə) ziyarət etdikdən sonra İmam Baqirin (ə) yanına gəlmişdim və Həzrət (ə) mənə buyurdu: “Ey Həmran! Sənə müjdə verirəm ki, hər kim Ali-Muhəmməd (ə) şəhidlərini ziyarət edər və bu işdəki niyyəti Allah rizası və Peyğəmbərə (s) yaxınlaşmaq olarsa günahlarından çıxar, anasından doğulmuş kimi olar”. 17. Behişt amili. İmam Sadiq (ə) buyurur: “Hər kim məskəninin behişt olmasını istəyirsə məzlumu (İmam Hüseyni (ə)) ziyarət etməyi tərk etməsin”. 18. Şəhadət və ziyarət. İmam Sadiq (ə) buyurur: “İmam Hüseynin (ə) hərəmini ziyarət edin və ziyarətini tərk etməklə ona zülm etməyin. Çünki o, behişt cavanlarının rəhbəri və şəhidlərin sərvəridir”. 19. Ziyarət – ən üstün əməldir. İmam Sadiq (ə) buyurur: “İmam Hüseyn (ə) qəbrini ziyarət etmək – ən üstün əməldir ki, yerinə yetirilə bilər”. (Beytutə) 20. Nur süfrəsi. İmam Sadiq (ə) buyurur: “Hər kim Qiyamət günü nur süfrəsində əyləşmək istəyirsə, gərək İmam Hüseyn (ə) zəvvarlarından olsun”. /Deyerler.org/

0 Oxu

Məqalələr